ஜெட் போர் விமானங்கள் வாங்கும் பிரேசில் : சுவீடன் நாட்டு நிறுவனத்திற்கு ஒப்பந்தம் வழங்கப்பட்டது

ரியோ தி ஜெனிரோ, டிச.20 (டி.என்.எஸ்) பிரேசில் நாட்டின் ஜெட் போர் விமானங்களுக்கான 4.5 பில்லியன் டாலர் ஒப்பந்தத்தை சுவீடன் நாட்டின் சாப் நிறுவனம் பெற்றுள்ளது. அமெரிக்காவின் போயிங் நிறுவனமும், பிரான்ஸ் நாட்டின் டஸ்ஸால்ட் நிறுவனமும் இந்தப் போட்டியில் முன் நின்றன. பிரெஞ்ச் அதிபர் ஹாலந்து பிரான்க்காய்ஸ் சென்ற வாரம் பிரேசில் சென்றிருந்தபோது தனிப்பட்ட முறையில் தங்கள் நாட்டு நிறுவனத்திற்கான பிரச்சாரத்தையும் மேற்கொண்டார்.

அமெரிக்காவின் போயிங் நிறுவனமே இந்த வாய்ப்பைப் பெறும் என்று அனைவராலும் எதிர்பார்க்கப்பட்டது. பிரேசில் பல ஆண்டுகளாக இந்த திட்டத்தை நிறுத்தி வைத்திருந்தது. பிரேசிலின் அதிபர் வில்மா ரூசோவின் விருப்பமும் போயிங் நிறுவனத்திற்கு ஆதரவாகவே இருக்கும் என்று எதிர்பார்க்கப்பட்டது. ஆனால், அமெரிக்கா மற்ற நாடுகளை உளவு பார்த்தது எட்வர்ட் ஸ்னோடென் மூலம் வெளிவந்தபோது பிரான்ஸ் நாடும் அதில் சிக்கியது தெரியவந்தது.

இதனால் கடந்த அக்டோபர் மாதம் அதிபர் வில்மா ரூசோவின் வாஷிங்டன் பயணம் ரத்து செய்யப்பட்டது. மேலும் இதில் ஏற்பட்ட மோதல்கள் போயிங் நிறுவனத்திற்குப் பாதகமாக முடிந்தது. ஏற்கனவே தென் கொரியாவின் ஒப்பந்தமும் போயிங்கிடமிருந்து கை நழுவியது இங்கு குறிப்பிடத்தகுந்தது.

தொழில்நுட்ப பரிமாற்றம், செலவுகள் மட்டுமின்றி பராமரிப்பும் கருத்தில் கொள்ளப்பட்டதால் சாப் நிறுவனம் தேர்வு செய்யப்பட்டதாக பிரேசிலின் பாதுகாப்புத்துறை அமைச்சர் செல்சோ அமோரிம் இந்த ஒப்பந்தம் குறித்து தெரிவித்துள்ளார். இந்த ஒப்பந்தத்தைப் பெற்றபின் சாப் நிறுவனத்தின் பங்குகள் கடந்த ஐந்து வருடங்களில் இல்லாத அளவிற்கு 30 சதவிகிதம் உயர்ந்துள்ளது குறிப்பிடத்தக்கது. 

காலமானார் எஸ்.எம்.ஏ. ஜின்னா

மதுரை சுந்தரராஜன்பட்டியில் உள்ள இந்திய பார்வையாற்றோர் சங்க (ஐஏபி) மேல்நிலைப் பள்ளி மற்றும் மறுவாழ்வு மையத்தின் நிறுவனர் எஸ்.எம்.ஏ.ஜின்னா (69), வியாழக்கிழமை (டிசம்பர் 19) காலமானார்.

இவரது சொந்த ஊர் திருநெல்வேலி மாவட்டம், ஏர்வாடி. ஐந்து வயதில் பெற்றோரை இழந்த இவர், மாமாவின் பராமரிப்பில் வளர்ந்தார். பதினான்காவது வயதில் வாகன விபத்தில் பார்வையை இழந்தார். இதனால் இவரது பள்ளிப் படிப்பு 5 ஆண்டுகள் தடைபட்டது. இருப்பினும், அவரது தன்னம்பிக்கையாலும், விடாமுயற்சியினாலும் பார்வையற்றோர் பள்ளியில் சேர்ந்து படித்தார். தொடர்ந்து முதுகலை பொருளாதாரம், முதுகலை கல்வியியல் பட்டம் பெற்றார். அமெரிக்காவின் பாஸ்டன் பல்கலைக்கழகத்தில் பார்வையற்றோருக்கான சிறப்பு ஆசிரியர் பயிற்சியை முடித்துள்ளார்.

1971 முதல் 74 வரை தமிழக அரசின் சமூக நலப் பணியாளர், 1974 முதல் 1980 வரை மதுரை அரசு பார்வையற்றோர் பள்ளியில் தலைமை ஆசிரியர், 1980 முதல் 99 வரை ஆசிரியராகப் பணியாற்றியுள்ளார்.

மதுரையில் இந்திய பார்வையற்றோர் சங்கத்தை 1985 இல் துவக்கினார். 4 பேருடன் துவங்கப்பட்ட இச் சங்கம், பார்வையற்றோர்கள் 1000 பேர் பயன்படக்கூடிய கல்வி நிறுவனமாக உயர்ந்துள்ளது. மேல்நிலைப் பள்ளி மற்றும் தொழிற் பயிற்சிப் பள்ளி இதில் செயல்பட்டு வருகிறது. தமிழகத்தின் அனைத்து பார்வையற்ற மாணவ, மாணவியருக்கு இங்கிருந்து பிரெய்லி புத்தகங்கள், ஒலி நாடாக்கள் குறைந்த விலையில் வழங்கப்பட்டு வருகின்றன.

ஜின்னாவின் சேவையைப் பாராட்டி 1993இல் தமிழக அரசு சிறந்த பணியாளருக்கான விருது வழங்கியுள்ளது. 1999 இல் பார்வையற்றோருக்கான சிறந்த மறுவாழ்வு மையத்துக்கான விருது, 2000 இல் மில்லேனியம் விருது, 2001 இல் மத்திய அரசின் சிறந்த சாதனையாளர் விருது, 2006 இல் தமிழக அரசின் சிறந்த நிறுவனத்துக்கான விருது, 2007 இல் மத்திய அரசின் சிறந்த நிறுவனத்துக்கான விருது, 2009 இல் சிறந்த சிறப்புப் பள்ளிக்கான விருதுகளைப் பெற்றுள்ளார். அண்மையில், இந்திய பார்வையற்றோர் சங்க மேல்நிலைப்பள்ளியின் அச்சகத்துக்கு, சிறந்த பிரெய்லி அச்சகத்துக்கான விருதை குடியரசுத் தலைவர் பிரணாப் முகர்ஜி வழங்கினார்.

ஜின்னாவுக்கு மனைவி நைனம்மாள், மகன் அப்துல் ரஹீம், மகள் ரோஷன் பாத்திமா ஆகியோர் உள்ளனர். ஜின்னாவின் இறுதிச் சடங்கு சுந்தரராஜன்பட்டி ஐஏபி பள்ளி வளாகத்தில் வெள்ளிக்கிழமை பகல் 12 மணிக்கு நடைபெறவுள்ளது. அல்அமீன் நகர் மசூதியில் பகல் 1.30 மணிக்கு நல்லடக்கம் செய்யப்படுகிறது.

மாறும் மதிப்பீடுகள்!!!

இச்சைகளை துறந்து விடு....
 பற்றற்று இரு....
 உலக இன்பங்கள் மீது ஆசை வைக்காதே....

இப்படியெல்லாம் உலகத்துக்கு புத்திமதி சொன்ன இந்தியாவில் மக்கள் இன்று அற்ப ஆசைகளின் பிடியில் சிக்கி நிம்மதி இழந்து தவிப்பதாக ஆய்வுகள் உறுதி செய்கின்றன.உலகம் போகும் போக்கு பற்றி ஐந்து கண்டங்களில் 20 நாடுகளில் இந்த இப்சோஸ் சர்வே நடத்தப்பட்டது. இருப்பதைக் கொண்டு திருப்தியுடன் வாழும் சமூகங்களாக  மதிக்கப்பட்ட இந்திய, சீன மக்கள் இன்று அடியோடு மாறிவிட்டதை ஆய்வு பதிவு செய்திருக்கிறது. நம்மைவிட சீனா இதில் மோசமான நிலையில் உள்ளது. 

ஒரு ரேடியோ, சைக்கிள், வாட்ச், தையல் மெஷின்.. இதுதான் வாழ்க்கையில் அடைய வேண்டிய பொருட்கள் என்று கம்யூனிச புரட்சியை தொடர்ந்த தலைமுறைகளில் சீனர்கள் நம்பினர். இன்று சொந்த வீடு, கார், ஸ்மார்ட்ஃபோன், லேப்டாப் இல்லாமல் ஒரு வாழ்க்கையா என கேட்கின்றனர். 71 சதவீத சீனர்களின் மனப்போக்கு இப்படி.இந்தியர்களில் 53 சதவீதம் அவ்வாறு நினைக்கிறார்கள். அதையெல்லாம் அடைவதற்கு நிறைய பணம் தேவை. அவ்வளவு சம்பாதிக்க கடுமையாக உழைக்க வேண்டும் என்ற துடிப்புடன் தொடர்ந்து இயங்குவதால் மன அழுத்தத்துக்கு ஆளாகின்றனர் என்று ஆய்வு சுட்டிக் காட்டுகிறது.ஒரு மனிதனின் வாழ்க்கை வெற்றிகரமாக அமைந்திருக்கிறதா என்பது அறிவு, திறமை, ஆரோக்கியம், வித்தை போன்ற பண்புகளையும் நலன்களையும் அடிப்படியாக கொண்டு மதிப்பிடப்பட்டது. 

சமீப காலத்தில் இந்த அளவுகோல் மாறிவிட்டது...
எவ்வளவு சொத்து....
என்ன வருமானம்....
எத்தனை வசதிகள் என்பதை வைத்து வெற்றிகரமான நபரா அல்லது வீணாய் போனவனா.....
என்று எடைபோடும் புதிய வழக்கம் நடைமுறைக்கு வந்துவிட்டது.

வளரும் நாடுகளான இந்தியா, சீனாவுடன் ஒப்பிடும்போது வளர்ச்சி அடைந்த ஸ்வீடன் (வெறும் 7 சதம்), டென்மார்க் போன்றவற்றில் மக்களின் ஆசைகள் கணிசமாக குறைந்துள்ளன. இந்தியர்களிடம் காணப்படும் மாற்றத்தின் இன்னொரு வெளிப்பாடு, நாட்டின் நிலைமை என்ன ஆகுமோ தெரியாது. ஆனால் நான் சீக்கிரம் நல்ல நிலைக்கு வருவேன்’ என்ற நம்பிக்கை.அது நடந்தாலும் சரிதான். மக்கள் நல்ல நிலைக்கு வந்தால் நாடு முன்னேறி விட்டதாகத்தானே அர்த்தம்.

கடன் பத்திரங்களை திரும்பப் பெறும் நடவடிக்கை ஜனவரியில் துவங்குகிறது

வாஷிங்டன்: அமெரிக்காவின் பெடரல் ரிசர்வ் (மத்திய வங்கி) டாலர்களின் புழக்கத்தை படிப்படியாகக் குறைக்கும் (குவாண்டிடேடிவ் ஈஸிங்) திட்டத்தை அறிவித்தது. அமெரிக்காவின் பொருளாதாரம், மந்தநிலையில் இருந்து மீட்சி பெறுவதால், அமெரிக்க மத்திய வங்கி, தான் ஏற்கனவே வெளியிட்ட கடன் பத்திரங்களை படிப்படியாக திரும்ப பெறப்போவதாக அறிவித்துள்ளது. கடந்த புதனன்று நடைபெற்ற பெடரல் ரிசர்வ் இயக்குநர்கள் குழு கூட்டத்தில் இந்த முடிவு எடுக்கப்பட்டது. கொள்கை முடிவு குறித்து 2 நாள் கூட்டத்தில் விவாதம் நடக்கிறது. மாதந்தோறும் 8,500 கோடி டாலர் அளவுக்கு கடன் பத்திரங்களை திரும்பப் பெறப் போவதாக முன்பு அறிவித்து இருந்தது. தற்போது 7,500 கோடி டாலர் அளவுக்கு திரும்பப் பெறப் போவதாக தெரிவித்துள்ளது. 1,000 கோடி டாலர் அளவுக்கு குறைத்துள்ளது. அடமானப் பத்திரங்கள், கருவூலப் பத்திரங்கள் என்று சரிவிகிதமாக பிரித்து திரும்பப் பெறப்படும் என்றும் குறிப்பிட்டுள்ளது.  அமெரிக்காவின் பொருளாதார நிலைமை, வேலைவாய்ப்பு சந்தை ஆகியவற்றில் வளர்ச்சி குறைவாக இருந்தபோதிலும், அரசின் ஊக்குவிப்பு நடவடிக்கைகள் சிறிது சிறிதாக வாபசாகும் என்று அறிவிக்கப்பட்டுள்ளது. 8,500 கோடி டாலர் மதிப்பீட்டிலான கடன் பத்திரங்களை திரும்ப பெறும் நடவடிக்கையை எதிர்பார்த்து உலகம் முழுவதும் நாடுகள் காத்திருந்தன. ஆனால், இதில் 1,000 கோடி டாலர் அளவுக்கு குறைத்து 7,500 கோடி டாலர் அளவுக்கு திரும்பப் பெறப்படும் என்று அமெரிக்க பெடரல் ரிசர்வ் வெளியிட்ட அறிவிப்பு பலருக்கும் ஆச்சரியத்தை ஏற்படுத்தி உள்ளது. அமெரிக்க மத்திய வங்கியின் புதிய தலைவராக உள்ள ஜானெட் யெல்லென் தெரிவு செய்யப்பட்டுள்ளார். இவரது நியமனத்தை அமெரிக்க செனட் சபை இந்த வாரம் இறுதியில் உறுதி செய்து அங்கீகாரம் அளிக்கும் என்று தெரிகிறது. தற்போதைய தலைவர் பெர்னான்கேவின் பதவி காலம் ஜனவரி 31ம் தேதியுடன் முடிகிறது. ஜானெட் யெல்லென் அண்மையில் அளித்த பேட்டியில், ‘‘கடன் பத்திரங்களை திரும்ப பெறும் நடவடிக்கை, படிப்படியாக திரும்பப் பெறப் படும் என்று கூறியிருந்தார். 

நிலைமையை இந்தியா சமாளிக்கும் மத்திய நிதியமைச்சர் உறுதி

புதுடெல்லி: அமெரிக்காவின் கடன் பத்திரங்களை திரும்பப் பெறும் நடவடிக்கையால் ஏற்படும் நிலைமையை இந்தியா திறம்பட சமாளிக்கும் என்று மத்திய நிதியமைச்சர் சிதம்பரம் நம்பிக்கையுடன் தெரிவித்தார். அமெரிக்காவின் பெடரல் ரிசர்வ் முடிவு ஏற்பட்டுள்ள நிலைமை குறித்து இந்திய ரிசர்வ் வங்கியின் கவர்னர் ரகுராம் ராஜனுடன் சிதம்பரம் நேற்று காலையில் பேசினார். கடந்த மே மாதம் இருந்த நிலையில் இருந்து தற்போது நன்றாக இருக்கிறோம். நிலைமையை சமாளிக்கும் விதத்தில் முன்னேற்றம் ஏற்பட்டுள்ளது என்று ராஜன் தெரிவித்தாக சிதம்பரம் கூறினார்.

ரூபாய் மதிப்பு சரியாமல் காக்க...

ஜனவரியில் அமெரிக்க பெடரல் ரிசர்வ், டாலர்கள் புழக¢கத்தில் விடுவதை குறைக¢கத் தொடங்கினால் அது ரூபாயின் மதிப்பை வீழ்த்தாமல் தடுக¢கும் வகையில் 2 முக்கிய முடிவுகளை ரிசர்வ் வங்கி எடுத்தது. 
 
1. வங்கிகள், வெளிநாடு வாழ் இந்தியர்களிடமிருந்து டாலர் டெபாசிட்டுகளைத் திரட்டுவதற்கு ஊக¢கம் அளிக¢கும் திட்டம். இதன்படி, வங்கிகள் திரட்டும் டாலர்களைப் பெற்றுக¢கொண்டு ரூபாய்களை வங்கிகளுக¢கு ரிசர்வ் வங்கி வழங்கும். கரன்ஸி சந்தையில் ஏற்படக் கூடிய ரிஸ்க¢கை சமாளிக¢க வங்கிகள் குறைந்த அளவில் (3.5 சதவீதம்) கட்டணம் செலுத்தினால் போதும் என்ற சலுகை தரப்பட்டுள்ளது.
  
2. வங்கிகள், வெளிநாட்டிலிருந்து டாலர் கடன்களை வாங்கி அதை ரிசர்வ் வங்கியிடம் சலுகை கட்டண (ஸ்வேப்) முறையில் ரூபாயாக மாற்றிக்  கொள்ளும் திட்டம்.
 
இந்த 2 திட்டங்கள் மூலம் நவம்பர் 30ம் தேதி வரையில் 3,200 கோடி டாலர்களை இந்தியா திரட்டி உள்ளது.
அமெரிக்கா பெடரல் ரிசர்வ் முடிவு புதனன்று வெளியான பின்னர், நேற்று செலாவணி சந்தையில் டாலருடனான ரூபாயின் மதிப்பு 62.14 ஆக இருந்தது.